Мэдээллийн аюулгүй байдлын бодлого

Мэдээллийн аюулгүй байдлын бодлого нь мэдээллийн аюулгүй байдал болон хүний хувийн мэдээлэл хамгаалахтай холбоотой аливаа эрсдэлийг удирдах, урьдчилан сэргийлэх замаар бизнесийн хэвийн ажиллагааг хангах мөн хүний хувийн мэдээллийг ашиглах, боловсруулах, хадгалах, аюулгүй байдлыг хангах ерөнхий шаардлагуудыг хэрэгжүүлж ажиллахад оршино.

Банк нь бүтээгдэхүүн, үйлчилгээгээ хүргэх, үйл ажиллагаагаа явуулах зорилгоор хүний хувийн мэдээллийг боловсруулдаг бөгөөд банкны болон харилцагчийн мэдээллийг ашиглахад мэдээллийн нууцлал, бүрэн бүтэн байдлыг хангах, тэдгээрийг боловсруулахад ашиглагдаж буй бүхий л систем, тоног төхөөрөмж, объектыг МАБ-ын эсрэг халдлага, зөрчил будилаанаас хамгаалах зорилготой.

Мэдээлэл технологийн үйл ажиллагаа нь хууль эрх зүй, зохицуулагч байгууллагуудын гэрээний болон бусад мэдээллийн аюулгүй байдал болон хүний хувийн мэдээлэл хамгаалах шаардлагуудыг хэрэгжүүлдэг мөн хангадаг байна.

Баримтлах үндсэн зарчим

Нууцлагдсан байдал: Мэдээлэл, мэдээллийн систем нь зөвшөөрөлгүй хандалт, нэвтрэлтээс бүрэн хамгаалагдсан, зөвхөн хандах эрх бүхий этгээд хандалтаар хязгаарлагдана.

Бүрэн бүтэн байдал: Мэдээлэл, мэдээллийн систем нь баталгаатай, үнэн зөв байх ба аливаа зөвшөөрөлгүй өөрчлөлтөөс хамгаалагдсан, зөвхөн эрх бүхий этгээд зөвшөөрөгдсөн хэм хэмжээнд өөрчлөх боломжтой байна.

Хүртээмжтэй байдал: Мэдээллийн системийн үйл ажиллагаа нь тасралтгүй хэвийн ажиллагаатай байж, мэдээлэл нь хэрэгцээтэй үедээ эрх бүхий этгээдэд нээлттэй байна.

Мэдээллийн эзнээс зөвшөөрөл авах: Мэдээлэл цуглуулах, боловсруулах, ашиглахдаа мэдээллийн эзнээс зөвшөөрөл авна.

Мэдээллийн эзний эрхийг хүндэтгэх: Мэдээллийн эзэнд өөрийн мэдээлэлтэй холбоотой эрхийг хэрэгжүүлэх боломжийг бүрдүүлж ажиллана.

Мэдээлэл цуглуулах, боловсруулах, ашиглах: Хүний хувийн мэдээллийн зөвхөн хуульд заасан үндэслэл, зорилгоор цуглуулж, боловсруулах, ашиглах  бөгөөд хүний хувийн мэдээлэл эзэмшигчид ил тод байдлаар боловсруулагддаг байна.

Хүний хувийн мэдээлэл гэж юу вэ?

“Хүний хувийн мэдээлэл” гэж хүний эмзэг мэдээлэл болон хүний эцэг /эх/-ийн нэр, өөрийн нэр, төрсөн он, сар, өдөр, төрсөн газар, оршин суугаа газрын хаяг, байршил, иргэний бүртгэлийн дугаар, хөрөнгө, боловсрол, гишүүнчлэл, цахим тодорхойлогч, хүнийг шууд болон шууд бусаар тодорхойлох, эсхүл тодорхойлох боломжтой бусад мэдээллийг хэлнэ. “Хүний хувийн мэдээлэл хамгаалах тухай хуулийн 4.1.11”

 “Хүний эмзэг мэдээлэл” гэж хүний үндэс, угсаа, шашин шүтлэг, итгэл үнэмшил, эрүүл мэнд, захидал харилцаа, генетик болон биометрик мэдээлэл, тоон гарын үсгийн хувийн түлхүүр, ял эдэлж байгаа болон ял эдэлсэн эсэх, бэлгийн болон хүйсийн чиг баримжаа, илэрхийлэл, бэлгийн харьцааны талаарх мэдээллийг ойлгоно.“Хүний хувийн мэдээлэл хамгаалах тухай хуулийн 4.1.12”

Хүний хувийн мэдээллийг цуглуулах зорилго:

Голомт банк нь Монгол Улсын Иргэний хууль, Банкны тухай хууль, Мөнгө угаах, терроризмыг санхүүжүүлэхтэй тэмцэх тухай хууль болон бусад хууль, төрийн эрх бүхий байгууллага, мөн зохицуулагч байгууллагын дүрэм журам, Голомт банкны дотоод бодлого, журам болон  ISO/IEC 27701:2019 стандартын хүрээнд хүний хувийн мэдээллийг хамгаалах, аюулгүй байдлыг хангах зорилгоор дээр дурдсан хууль тогтоомж, стандартуудын хүрээнд хүний хувийн мэдээллийг цуглуулах, боловсруулах үйл ажиллагаа явуулна. Хүний хувийн мэдээллийг цуглуулан банк хуульд заасан үүргээ биелүүлэх ба дараах төрлийн үйл ажиллагааг хэрэгжүүлэх ба үүгээр хязгаарлахгүй. Үүнд:

• Банканд харилцагчийг бүртгэж, бүтээгдэхүүн үйлчилгээ үзүүлэх
• Харилцагчийн хэрэгцээ шаардлагад нийцсэн бүтээгдэхүүн үйлчилгээг хүргэх
• Харилцагчаас ирүүлсэн санал хүсэлт, гомдолд дүн шинжилгээ хийх, шалгах, шаардлагатай тохиолдолд нөхөн барагдуулах, болзошгүй эрсдэлээс урьдчилан сэргийлэх
• Харилцагчийн мэдээлэлд үндэслэн тохирох бүтээгдэхүүн үйлчилгээг санал болгож, харилцагчид хүргэх үйлчилгээний чанарыг сайжруулах
• Харилцагчийн үйлчилгээ үзүүлэх явцад хувийн мэдээллийн зөрүүтэй байдал үүсэхээс урьдчилан сэргийлэх, танин баталгаажуулах
• Харилцагчийн мэдээллийг хадгалж байгаа банкны систем, байр, АТМ, Киоск машины хамгаалалт болон аюулгүй байдлыг хангах

Голомт банканд цуглуулж буй хүний хувийн мэдээлэл

Голомт банк нь хүний хувийн мэдээллийг цуглуулах, боловсруулахыг харилцагч зөвшөөрч, банканд зөвшөөрөл өгсөн тохиолдолд банкны бүтээгдэхүүн, үйлчилгээг үзүүлнэ. Бид цуглуулсан мэдээлэлд үндэслэн  харилцагчийг таньж баталгаажуулах, үйлчилгээ үзүүлэх,  шинэ бүтээгдэхүүн, үйлчилгээ санал болгох болон мэдээлэл өгөх зорилгоор ашиглана.

Цуглуулан авах мэдээллүүд:

• Хүний хувийн мэдээлэл
• Голомт банкны цахим бүтээгдэхүүн үйлчилгээнд хандсан төхөөрөмжийн хандалтын түүх
• Дансны үлдэгдэл, гүйлгээний түүх болон зээлийн мэдээллүүд
• Хөрөнгө болон орлогын мэдээлэл
• Боловсролын мэдээлэл
• Хөдөлмөр эрхлэлтийн талаарх мэдээлэл
• Гэрлэлт, гэр бүлийн талаарх мэдээлэл
• Бусад шаардлагатай мэдээлэл

Голомт банк нь хуулиар хүлээсэн үүргээ биелүүлэхийн тулд харилцагчаас гадна бусад эх сурвалжаас хувийн мэдээллүүдийг цуглуулдаг.

• Гуравдагч байгууллагуудаас ирүүлж болох мэдээлэл /Нийгмийн даатгал, татвар, ШШГЕГ, Монголбанк, Зээлийн мэдээллийн сангийн гэрээт байгууллагууд, бусад төрийн байгууллага

Хувийн мэдээллээ өгөх болон татгалзах эрх

Мэдээллийн эзэн буюу харилцагч нь харилцагчаар бүртгүүлэх, банкнаас үйлчилгээ авах хүсэлтээ өөрийн биеэр илэрхийлж, гэрээний зүйл заалт, нөхцөл, шаардлагуудын хүрээнд үнэн зөв мэдээллүүдийг гаргаж өгөхийг хүлээн зөвшөөрсөн тохиолдолд Голомт банк нь холбогдох гэрээг байгуулснаар үйлчилгээ үзүүлнэ.

Харилцагч нь банкны бүтээгдэхүүн үйлчилгээтэй холбоотой гэрээг байгуулахын өмнө тус гэрээний нөхцөл болон зүйл заалтыг хүлээн зөвшөөрөөгүй тохиолдолд банк үйлчилгээ үзүүлэхээс татгалзах эрхтэй.

Хүний хувийн мэдээллийг дамжуулдаг байгууллагууд

Голомт банк нь Монгол Улсын Хүний хувийн мэдээлэл хамгаалах тухай хууль болон бусад хууль тогтоомжийн хүрээнд төрийн эрх бүхий байгууллага болон хууль хяналтын байгууллагуудад харилцагчийн хувийн мэдээллийг гаргаж өгөх үүрэгтэй. Мөн шаардлагатай тохиолдолд харилцагчийн өгсөн зөвшөөрөлд үндэслэн гуравдагч байгууллагуудад түгээх, дамжуулах боломжтой.